Nga UNI rreth botës: Someja Nuhiu përjeton Erasmus+ në Turqi
Rrëfimi
Përtej ligjëratave dhe studimeve, një semestër jashtë vendit është një mundësi për të zbuluar kultura të reja, për të njohur njerëz të ndryshëm dhe për të krijuar përvoja që mbeten gjatë. Përmes programit Erasmus+, studentët e UNI – Universum International College kanë mundësinë të përjetojnë një pjesë të studimeve të tyre në universitete ndërkombëtare dhe të pasurojnë rrugëtimin e tyre akademik e personal.
Këtë mundësi e shfrytëzoi edhe Someja Nuhiu, studente e Computer Science në UNI, e cila përmes programit Erasmus+ kaloi një semestër në Middle East Technical University (METU) në Turqi.
Gjatë qëndrimit të saj në METU, Someja pati mundësinë të vazhdojë studimet në një ambient të ri akademik dhe të përjetojë nga afër jetën universitare në Turqi. Për të, kjo eksperiencë ishte gjithashtu një mundësi për të njohur më mirë historinë dhe kulturën e vendit.
“Erasmus+ më dha mundësinë të përjetoja Turqinë jo vetëm si një vend ku po studioja, por edhe si një vend me një histori dhe kulturë shumë të pasur. Vizitimi i vendeve historike dhe përjetimi i atmosferës kulturore ishte një nga pjesët më të veçanta të kësaj eksperience.”
Gjatë semestrit, Someja udhëtoi dhe vizitoi vende të ndryshme historike në Turqi, duke pasur mundësinë të njihte nga afër trashëgiminë kulturore të vendit. Këto udhëtime i dhanë një dimension tjetër përvojës së saj Erasmus+, duke e bërë atë më shumë sesa një eksperiencë akademike.
Për Somejën, qëndrimi në Turqi ishte një mundësi për të dalë përtej rutinës së zakonshme studentore, për të zbuluar vende të reja dhe për të përjetuar një kulturë ndryshe. Ajo u kthye nga kjo përvojë me kujtime të veçanta, njohuri të reja dhe një perspektivë më të gjerë kulturore.
Përmes mundësive të Erasmus+, studentët e UNI, një institucion i fuqizuar nga Arizona State University, vazhdojnë të ndërtojnë përvoja ndërkombëtare që i ndihmojnë të zhvillohen si akademikisht, ashtu edhe personalisht.

