Mjeshtëria e shitjes (8): Ku po shkon tregtia online?

Vitet e fundit diskutohet shumë për shitblerjet online: p.sh. si u hap amazon.com, ebay.com, Aliexpres.com, smardonline.com e tani edhe gjirafa50.com?

Për sa kohë do të jetë aktuale tema e shitblerjeve online (e-commerce)?

Kjo temë do të jetë interesante dhe aktuale edhe për 5-10 vite.

E, çfarë do të ndodhë pastaj?

Do të avancohet çdo ditë e më shumë kjo mënyrë e shitblerjes dhe do të jetë pjesë e zakonshme dhe e pandashme e jetës tonë (siç është rryma elektrike). Madje, do të jetë e pamundur të mendohet jeta pa të (në artikullin paraprak e kemi parë përmes statistikave se si ky trend nuk ka të ndalur).

Nuk mjafton veç ta hapim një dyqan digjital e të vendosim aty një sasi produktesh. Numri i konsumatorëve rritet bashkë me kërkesat e tyre – jo vetëm për atë se çfarë duan të blejnë, por gjithashtu edhe nga përvoja e tyre dhe nga kënaqësia e kërkimit të produkteve. Gjithashtu, këtu hyn edhe shërbimi ndaj klientit, i cili duhet të ofrohet gjatë gjithë kohës: para, përgjatë dhe pas porosisë.

Deri në fund të vitit 2018, në online pritet të ketë shitje në vlerë të 490 miliardë dollarëve vetëm në SHBA.

Nëse duam të ndërtojmë një brand online, në botën e e-commerce-it duhet të përcjellim dhe të zbatojmë disa trende. Sepse, çdo ditë e më shumë kompanitë e prezantojnë përmbajtjen e re, unike dhe imponuese, për të tërhequr vëmendjen e konsumatorit. Kjo ndihmon në angazhim dhe ndërton një lidhje emocionale me brandin, në përputhje me trendet që janë si në vijim:

Përshtatshmëria: Përvoja dinamike e blerjes online që do t’i përshtatet blerësit në kohë reale

Secili blerës do ta ketë një qasje në përmbajtje: në bazë të rekomandimeve të përzgjedhura sipas preferencave, lokacionit gjeografik, trendeve të tregut, grupit demografik, porosive të kaluara dhe interakisonit me brande. Do të ketë rekomandime të moderuara, sipas shijes së blerësit, duke u bazuar nga blerjet e mëparshme të blerësit, të produkteve të pëlqyera apo të shikuara. Kjo do të jetë sikur të hysh në një dyqan real ku shitësi ua di emrin dhe e di se çfarë juve ju pëlqen.

Prodhuesi i njohur francez i kozmetikës, L’Oreal, ka dizajnuar një aplikacion për telefonat e zgjuar me pesë menu– për diagnostifikim, për kujdesin ndaj lëkurës, kozmetikën, kujdesin ndaj flokëve dhe për ngjyra të flokëve. Kjo është mundësi e mirë për konsumatorët që të luajnë me pamje të ndryshme, duke provuar stile të ndryshme. Vajzat njëkohësisht kënaqen duke krijuar lidhjen unike me kompaninë. Aty janë përshtatur edhe kuponët me zbritje, mënyrë kjo e mirë e komunikimit që ka ndikim të madh në vendimin për të porositur produktin.

Të dhënat si shërbim dhe tregti online: copëza pafund për përshtatshmërinë e përkryer

Njerëzit zakonisht blejnë duke u bazuar te leximi i referencave dhe komenteve të blerësve. Sa më shumë që ka informacione të produktit – fotografi, përshtypje, përshkrime, specifika etj. – aq me shumë blerës (fillimisht të pavendosur) do të blejnë online. Në vitin 2017, shumë dyqane online do të nisin të punojnë me agregatorët e të dhënave, të cilat i mbledhin nga miliona produkte, përshkrime, krahasime të çmimeve, specifikave, kodeve, komenteve etj. Tregtari do të jetë në gjendje të lidhë të gjitha të dhënat nga databaza dhe automatikisht t’i përditësojë informacionet për produktin. Kështu mund t’i jepet lamtumira pasigurisë dhe mungesës së informacioneve rreth produktit.

Përshëndetje, ti Inteligjencë Artificiale

Konsumatori do të ketë bashkëveprim me inteligjencën artificiale dhe do ta dojë atë. Nëpërmjet kësaj teknologjie do të bëhet kërkimi automatik i produkteve me anë të zërit. “Chatbot” do të jenë vend i zakonshëm i automatizuar, të cilin do ta praktikojnë shumë platforma.

Kompanitë e mëdha botërore kanë zhvilluar “chatbot” për komunikim artificial me njerëz: Windows ka krijuar Cortana-n, Apple ka krijuar Siri-n, Google ka krijuar Google Now-in, Amazon ka krijuar Alexa-n etj.

Gjatë viteve në vijim, shumë konsumatorë do të kenë bashkëveprim me “chatbot”-in, me një agjent-robot të automatizuar kundrejt pyetjeve, i cili do të veprojë si kontakt i parë me brandin. Kjo do të ndikojë në ngritje të shitjeve prej 5-30%.

Kompanit H&M, Sephora dhe Victoria’s Secret, kanë prezantuar“chatbot”-ët në “Kik platform”-ën që po tregohet shumë e suksesshme. Në Burger King dhe Pizza Hut, konsumatorët mund të porosisin ushqim direkt nëpërmjet Facebook-ut, Messenger-it dhe Twitter-it, duke dërguar mesazhe në “chatbot”-in e zinxhirëve të restoranteve.

Mirupafshim kuletë: Fillimi i fundit të cash-it

Vitin e kaluar, Master Card – në partneritet me kompaninë BMO – kanë lançuar produktin “Selfie Pay”, shërbim i cili përdor identitetin biometrik të përdoruesit – portretin – për të identifikuar blerësin. Produkti është në përdorim për të verifikuar porosinë online dhe ka potencialin të vazhdojë me transaksionet pa cash.

Kompania Visa Card, gjatë lojërave olimpike në Rio, e ka sponsorizuar pagesën me unazë në posterminal.

Tregtia në kohë reale në hiper-lokacione

Kompania farmaceutike Walgreens, u mundëson përdoruesve me aplikacion mobile – duke skanuar shishen e medikamentit – ta mbajë mend atë dhe kur të kalojë pranë ndonjë dyqani të caktuar, ta njoftojë se aty ka ashtu lloj mendikamenti (ose kur kalon përgjatë ndonjë dyqani, nëse ka ofertë për atë produkt). Këto avantazhe teknologjike po i shfrytëzojnë kompanitë për ta lehtësuar jetën e konsumatorit dhe për të rritur shitjet.

Parashikimi i blerjeve të ardhshme nga konsumatorët

Teknologjia për parashikim të porosive të ardhshme është e shpejtë dhe po popullarizohet mes shitësve online. Duke pasur në dispozicion të dhënat e mbledhura gjatë bashkëveprimit me konsumatorin në profilin e tij, tregtarët përdorin analizat e parashikimit për të kuptuar më mirë shprehitë e porosive, preferencat, moshën, apo porositë e ardhshme në bazë të sjelljeve të konsumatorëve me profile të ngjashme.

Dyqanet online do të ofrojnë dërgesa brenda ditës

Përderisa dyqanet online do të vazhdojnë të rriten, konsumatorët do të pranojnë porosi brenda ditës ose në fund të orarit. Shumë prej dyqaneve online, që operojnë në hapësira të vogla, do të kenë dhoma të provës së veshmbathjes dhe prekjes së tyre, për të pasur mundësinë që të ndjejnë produktin. Për ta arritur këtë qëllim, dërgesën brenda ditës, Walmart dhe Amazon janë duke bërë negociata me kompanitë Uber dhe Lyft, që t’i hulumtojnë mundësinë e dërgesave brenda ditës .

Blerësit duan të ndërlidhen direkt me brandin

Duke pasur parasysh se njerëzit preferojnë të kenë lidhje direkte me brandin, përdoruesit kjo do t’i mundësohet. Kjo bëhet nëpërmjet proceseve të automatizuara me sisteme CRM, për të ruajtur marrëdhënien me konsumatorin dhe për të thjeshtësuar procesin e porosisë.

Ali Express B2C, pjesë e grupit AliBaba, u mundëson prodhuesve të merren vesh direkt me blerësit e fundit, në mbarë botën, falë platformës së standardizuar e të përshtatur për këtë logjistikë.

Mobile dhe vetëm mobile: Tejkalim i PC-ve

Sipas statistikave të fundit, 150 herë në ditë bëjmë shfletim të internetit në telefona të zgjuar. Me këtë angazhim, mund ta imagjinoni se ç’ka është e mundur të bëni në e-commerce. Shumë kompani po investojnë në platforma mobile për tregti elektronike. Qasja e mëparshme, ndaj versionit mobile, ka qenë përshtatja e versionit Desktop në atë mobile. Tani po punohet në eksperiencën direkte mobile, që të jetë sa më e përshtatshme dhe më e lehtë që të porositet produkti.

Fotografitë e mëdha dhe videot për produkte

Shikimi i videove u ndihmon 90% të vizitorëve të vendosin për porosinë. Dyqanet online janë duke punuar që të kenë banera me foto të mëdha dhe sa me të “gjalla”. Produktet – përveç fotografive të shumta dhe tekstit për sqarim sa më të mirë të produkteve – do të kenë vend për video-prezantime (73% e njerëzve porosisin pasi e shohin videon). Konsumatorët thonë se ata dëshirojnë të shohin se ç’ka po marrin, funksionet e produktit, se si përdoret etj.

Marketingu në median online dhe rrjetet sociale

Fokusi i marketingut të dyqaneve online do të jetë në portalet online dhe në rrjetet sociale, për shkak të mundësisë së targetimit më të lehtë (sipas moshës, interesave dhe preferencave të vizitorëve).

Automatizimi i marketingut

Me rastin e regjistrimit tuaj në web-faqe, në shumicën e kompanive e-commerce do të pajtoheni me kushtet dhe rregullat e përdorimit. Ata mund t’ju dërgojnë vazhdimisht oferta për produktet e tyre, oferta këto që shpesh as nuk i hapni. Automatizimi i marketingut mund t’u ndihmojë atyre kur keni sasi të mëdha email-esh, që nëpërmjet platformës Mailchimp të shpërndahen më mirë.

Bashkimi i tregtisë klasike me e-commerce

Unifikimi i tregtisë nënkupton kalimin prej dyqaneve fizike në dyqane virtuale, duke e ndërtuar dyqanin online apo duke u inkuadruar në dyqane me infrastrukturë të madhe e të centralizuar (me prezencën e tyre online, ku rritja e shitjeve do të reflektohet çdo ditë e më tepër).

Burimi:businessmag.al